Íbúar í borginni Lake Worth í Flórída fengu skilaboð í farsíma sína aðfaranótt sunnudags þar sem varað var við rafmagnsleysi og uppvakningum. Guardian greinir frá.
„Rafmagnsleysis- og uppvakningaviðvörun til íbúa Lake Worth og Terminus,“ stóð í skilaboðunum, en Terminus er tilvitnun í borgarnafn í þáttunum The Walking Dead.
BREAKING: Lake Worth falsely sends out ‘zombie’ alert during power outage https://t.co/LJOVesWFVU pic.twitter.com/7D5HPQovga
— The Palm Beach Post (@pbpost) May 21, 2018
Þar stóð að yfir 7.300 heimili væru nú rafmagnslaus vegna mikillar uppvakningavirkni. Ekki væri ljóst hve lengi tæki að koma rafmagni aftur á.
Talsmaður Lake Worth-borgar sagði að verið væri að rannsaka atvikið og tók sérstaklega fram að engir uppvakningar væru í borginni um þessar mundir.
Hann sagði að 7.880 heimili hefðu orðið rafmagnslaus en að því hefði verið komið aftur á eftir 30 mínútur.