Níu skotnir í Svíþjóð um helgina

Að minnsta kosti níu menn voru skotnir í Svíþjóð á föstudag og um helgina. Þar af létust þrír. Stefan Löfven, forsætisráðherra landsins, segir að fjármagn til lögreglunnar verði aukið um 2 milljarða sænskra króna, 26 milljarða íslenskra króna, á næsta ári.

Þetta kemur fram í frétt á vef sænska ríkissjónvarpsins.

Á föstudag, laugardag og í dag hafa að minnsta kosti níu skotárásir verið gerðar í Svíþjóð. Þrír létust. 

Á föstudag voru tveir menn skotnir í borginni Västerås. Á föstudagskvöld var maður skotinn til bana í Uppsölum. Þá voru tveir menn skotnir í Malmö. Þeir særðust ekki alvarlega. Þetta sama kvöld var maður skotinn í Stokkhólmi. Hann var fluttur á sjúkrahús en lést þar af sárum sínum.

Að kvöldi laugardagsins var maður skotinn skammt frá Borås. Hann lést síðar sama kvöld.

Aðfaranótt sunnudagsins var maður skotinn í fótinn í Lysekils, skammt frá Gautaborg. Lögreglan handtók mann í tengslum við árásina. Þessa nótt var einnig gerð skotárás á hús skammt frá Gautaborg. Enginn særðist í árásinni.

Í kvöld var svo gerð árás í Herrljunga. Einn maður særðist og var hann fluttur á sjúkrahús.

• 1 blogg um fréttina

Bloggað um fréttina

• Valdimar Samúelsson: Svíjarnir auka bara fjármagn til lögreglunar og flóttamenn til landsins …