Svisslendingur var handtekinn í Frankfurt á föstudag, grunaður um njósnir.
Í frétt BBC segir að saksóknari í Þýskalandi hafi manninn grunaðan um að hafa starfað fyrir leyniþjónustu erlends ríkis, allt frá því snemma árs árið 2012. Fréttir í Þýskalandi herma að maðurinn hafi m.a. njósnað um starfsmenn skattrannsóknarstjóra í landinu.
Skattayfirvöld í Þýskalandi hafa keypt gögn af uppljóstrurum sem tengjast viðskiptavinum svissneskra banka. Vilja skattayfirvöld hafa hendur í hári þeirra Þjóðverja sem fela fé á bankareikningum í Sviss.
Málið hefur, að því er fram kemur í frétt BBC, spillt sambandi svissneskra og þýskra stjórnvalda. Stjórnvöld í Sviss telja það rangt að borga fyrir gögn sem stolið er úr bönkum þar í landi. Þjóðverjar segjast með aðgerðum sínum vera að uppljóstra um skattsvik.
Hinn meinti njósnari er kallaður Daniel M í þýskum fréttum. Hann er sagður 54 ára gamall. Hann var handtekinn á föstudag en handtökuskipunin var gefin út í desember.