Útgönguspár benda til þess að miðjumaðurinn Emmanuel Macron og Marine Le Pen hafi borið sigur úr býtum í fyrri umferð frönsku forsetakosninganna. Þau muni því mætast í seinni umferðinni sem fer fram 7. maí.

Þetta kemur fram á vef BBC, sem vísar í franska ríkissjónvarpið.

Macron er sagður hafa fengið 23,7% atkvæða og Le Pen 21,7%.

Alls buðu 11 sig fram til forseta en helstu andstæðingar Macron og Le Pen voru Francois Fillon, frambjóðandi mið- og hægrimanna, og harðlínuvinstrimaðurinn Jean-Luc Melenchon. Stuðningur við þá báða mældist 19,5% samkvæmt útgönguspám.

Macron er fyrrverandi efnahagsmálaráðherra í stjórn Sósíalistaflokksins. Hann sagði sig úr honum og stofnaði nýjan stjórnmálaflokk í ágúst til að bjóða sig fram til forseta.

Macron var fé­lagi í Sósí­al­ista­flokkn­um frá 2006 til árs­ins 2009. Hann hóf störf fyr­ir Hollande for­seta Frakk­lands árið 2012 en hafði frá 2011 aðstoðað Hollande við fram­boðið og var skipaður iðnaðar- og efna­hags­málaráðherra í rík­is­stjórn Manu­els Valls í ág­úst 2014. Hann sagði af sér embætti 30. ág­úst 2016 og stofnaði um svipað leyti nýj­an stjór­nála­flokk, miðju­flokk­inn En Marce eða Hreyf­ing­una á ís­lensku.

Ef Macron verður kjör­inn for­seti verður hann yngst­ur til þess að gegna því embætti í Frakklandi.

Faðir Le Pen stofnaði Þjóðfylkinguna fyrir hálfum fimmta áratug. Andstaða við Evrópubandalagið (nú Evrópusambandið, ESB) hefur verið á stefnuskránni frá upphafi, flokkurinn er alfarið á móti Schengen-samstarfi Evrópuríkja um ytri landamæri álfunnar en sá liður í stefnuskrá flokksins sem lengi vakti mesta athygli, og deilur, var andúð á innflytjendum. Frakkland fyrir Frakka, var slagorð flokksins.

Hún hefur lagt áherslu á að milda ímynd sína til að auka líkurnar á því að hún verði forseti. Hún vék föður sínum, Jean-Marie Le Pen, frá sem heiðursformanni Þjóðfylkingarinnar árið 2015 vegna umdeildra yfirlýsinga hans. Hún hefur einnig mildað yfirlýsingar sínar um múslima og íslam.