Rekinn en fær milljarða

Fyrrverandi þáttastjórnandinn og fréttaþulurinn Bill O'Reilly fær að öllum líkindum starfslokasamning sem nemur 25 milljónum dala, um 2,7 milljörðum króna, eftir að hafa verið sagt upp störfum hjá sjónvarpsstöðinni Fox í kjölfar ásakana um kynferðislega áreitni. 

Fox hefur ekki staðfest þessa upphæð en um er að ræða árslaun þáttastjórnandans.

Frétt af mbl.is

Sakaður um að áreita fimm konur

O'Reilly var gríðarlega vinsæll meðal áhorfenda en hann stjórnaði m.a. þættinum The O´Reilly Factor sem hóf göngu sína árið 1996. Þátturinn var sýndur á kvöldin og hefur nú verið tekinn af dagskrá. Sá sem fylla mun í skarðið er Tucker Carlson. Sá hafði áður stýrt þætti síðar á kvöldin í stað fréttakonunnar Megyn Kelly sem fór frá Fox til að stýra þætti hjá NBC.

Þetta er ekki í fyrsta sinn sem ásakanir um kynferðislegt áreiti koma upp hjá stöðinni. Kelly sagði sjálf frá því fyrir nokkuð að hún hafi verið áreitt af fyrrverandi stjórnenda sjónvarpsstöðvarinnar, Roger Ailes. Hann hætti störfum hjá Fox á síðasta ári eftir fjölda ásakana um kynferðislegt áreiti.

1. apríl birti New York Times frétt um að í það minnsta fimm konur hefðu sakað O'Reilly um kynferðislegt áreiti og fengið háar bætur frá sjónvarpsstöðinni.

Í kjölfar fréttanna hættu margir auglýsendur að auglýsa í þætti hans og á Fox-sjónvarpsstöðinni. Þá loks ákváðu stjórnendur Fox að láta hann fara. 

• Blogga um frétt