Mark Zuckerberg, stofnandi Facebook, greindi frá því í dag að hann og eiginkona hans, Priscilla Chan, ættu von á dóttur. Þau eiga fyrir hina eins árs Maximu.
„Við erum öll betri manneskjur vegna sterku kvennanna í lífi okkar; systra, mæðra og vina,“ skrifaði Zuckerberg á Facebook. „Við getum ekki beðið eftir því að taka á móti nýju litlunni okkar og gera okkar besta til að ala upp aðra sterka konu.“
Í kjölfar þess að Max, eins og hún er kölluð, kom í heiminn í nóvember 2015 sögðu Zuckerberg og Chang að þau hygðust gefa 99% auðs síns til góðgerðarmála „til að bæta líf allra þeirra sem fæðast inn í þennan heim.“
Góðgerðarstofnun sem nýtur stuðnings hjónanna fjárfesti í kanadísku gervigreindarfyrirtæki með það að markmiði að uppræta sjúkdóma. Í fyrra hétu þau því að verja 3 milljörðum dala á næsta áratug til að útrýma sjúkdómum eða finna við þeim lækningar.