Ólafur Darri einn eigenda ACT4

Nýstofnað kvikmyndaframleiðslufyrirtæki, ACT4, hefur tryggt sér fjármögnun frá hópi innlendra og erlendra fjárfesta, að þvi er fram kemur í tilkynningu og tryggir sú fjármögnun félaginu rekstrargrundvöll til næstu ára sem verður nýttur til að þróa og fjármagna framleiðslu á íslensku sjónvarpsefni fyrir alþjóðamarkað. Stofnendur ACT4 eru Hörður Rúnarsson, Ólafur Darri Ólafsson, Jónas Margeir Ingólfsson og Birkir Blær Ingólfsson. 

Hörður er framleiðandi og höfundur hjá ACT 4 og hefur komið sem framleiðandi að verkefnum á borð við Svörtu sanda, Vitjanir, og Venjulegt fólk. Ólafur Darri er landskunnur leikari og hefur líka komið að handritaskrifum og framleiðslu. Hann mun héðan í frá vinna undir merkjum ACT4 og hefur unnið með kvikmyndaleikstjórum á borð við Steven Spielberg og Ben Stiller. Ólafur Darri verður framleiðandi og höfundur hjá ACT 4. Jónas Margeir verður framkvæmdastjóri ACT 4 en hann hefur starfað sem lögfræðingur og ráðgjafi viði kvikmyndaverkefni, starfar einnig sem handritshöfundur og hefur m.a. komið að þáttunum Ráðherrann, Ísalög og Stellu Blómkvist 2. Birkir Blær er höfundur og þekktur fyrir sjónvarpsþætti á borð við Ráðherrann og Ísalög. Hann verður þróunarstjóri ACT4.

„Mér er sönn ánægja að tilkynna um stofnun og fjármögnun ACT4. Við ætlum okkur að framleiða vandað íslenskt sjónvarpsefni til sýningar hér og erlendis. Okkur er mjög umhugað að vanda til verka, leitast við að ná fram gæðum og fagmennsku, bæði á skjánum og innan þeirra verkefna sem við tökum að okkur. Og svona á persónulegri nótum þá hlakka ég til að nýta þetta tækifæri til að styrkja tengslin sem ég hef myndað í störfum mínum á síðustu árum við magnaða listamenn og vonandi lokka þá til samstarfs hér á Íslandi,“ segir Ólafur Darri í tilkynningu og Jónas Margeir segir að það að fá alþjóðlegan hóp fjárfesta til liðs við félagið sé fyrir honum sönnun þess að árangur íslenskrar kvikmyndagerðar á undanförnum árum, sem og 35% endurgreiðsla sem stjórnvöld kynntu á þessu ári, hafi skapað umhverfi þar sem kvikmyndaiðnaðurinn muni vaxa og dafna sem öflug útflutningsgrein.

Segir í tilkynningunni að innan félagsins séu mörg spennandi verkefni í burðarliðnum sem verði kynnt á næstu vikum. Variety fjallaði fyrst um málið.

• Blogga um frétt