Oprah mælir með íslenskri bók

Bókin Kvika, eða Magma í enskri þýðingu, eftir rithöfundinn Þóru Hjörleifsdóttur er á lista lífstílsvefsins Oprah Daily yfir best þýddu bækur til að ferðast um heiminn með. Vefurinn er á vegum Opruh Winfrey en Hamilton Cain tók listann saman. 

Kvika er í þriðja sæti á listanum og segir Cain bókina vera heillandi og áhrifamikla. 

Bókin er fyrsta skáldsaga Þóru og kom hún út árið 2019. Hún hefur einnig verið þýdd á dönsku en ljóðskáldið og þýðandinn Meg Maitch þýddi hana yfir á ensku og kom hún út í Bandaríkjunum og Bretlandi í sumar. 

Þóra er einnig í hópi kvenna sem kalla sig Svikaskáld og hefur með þeim staðið fyrir ýmsum ljóðaviðburðum og gefið út bækurnar Ég er ekki að rétta upp hönd og Ég er fagnaðarsöngur.

• Blogga um frétt