Jennifer Gates, elsta dóttir auðkýfingsins Bills Gates og Melindu Gates, mun ganga í það heilaga á hestabúgarði sínum Westchester County í New York-ríki um helgina. Um er að ræða heljarinnar brúðkaup þar sem aðeins þeim ríku og frægu er boðið. New York Post greinir frá.
Jennifer Gates trúlofaðist milljónamæringnum Nayel Nassar í upphafi síðasta árs. Nassar er af egypskum ættum, vel efnaður og keppir í reiðmennsku. Hann er þrítugur en Gates 25 ára.
Brúðkaupið fer fram á búgarðinum sem foreldrar hennar keyptu handa henni árið 2018, stuttu eftir að hún útskrifaðist úr Stanford-háskóla.
Öllu verður tjaldað til á búgarðinum en undanfarnar tvær vikur hefur mikið gengið á. Búið er að byggja svið, skála fyrir veisluna og koma fyrir kömrum.