Bandaríski leikarinn Bob Odenkirk, sem er þekktastur fyrir leik sinn sem Saul Goodman í vinsælu bandarísku sjónvarpsþáttunum Breaking Bad og Better Call Saul, liggur á sjúkrahúsi eftir hjartaáfall.
Á þriðjudag var Odenkirk við tökur á sjöttu seríu af sjónvarpsþáttunum Better Call Saul í Nýja-Mexíkóríki í Bandaríkjunum þegar hann hneig niður og var fluttur á sjúkrahús.
Ástand hans er sagt stöðugt. Sonur Odenkirks, Nate, greinir frá því á samfélagsmiðlinum Twitter að það muni verða í lagi með föður hans. Leikarinn er 58 ára gamall.
He's going to be okay.
— Nate Odenkirk (@birthdaynate) July 28, 2021