Söngkonan Mel C, úr stúlknahljómsveitinni Spice Girls, segist handviss um að Victoria Beckham myndi elska að syngja aftur með hljómsveitinni á tónlistarhátíð. Beckham var hluti af stúlknahljómsveitinni ásamt þeim Geri Haliwell, Emmu Bunton, Mel B og Mel C.
„Á milli mín og þín, veit ég að frú Beckham mynd elska að koma fram á Glastonbury,“ sagði Mel C í breskum sjónvarpsþætti að því fram kemur á vef ET en gaf góðan fyrirvara um sannleiksgildi orða sinna.
Kryddpíurnar fóru saman á tónleikaferðalag árið 2019 án Victoriu Beckham. Mel C segir Kryddpíurnar tala mikið um að koma saman aftur. „Við tölum stanslaust um að koma saman aftur á sviði af því að tónleikarnir 2019 voru frábærir og við myndum elska að koma fram aftur þegar heimurinn leyfir,“ sagði Mel C.