Ísraelska ríkissjónvarpið greindi frá því í dag að samkomulag hefði náðst um greiðslu skuldar við Samband evrópskra sjónvarpsstöðva, EBU. Án greiðslu skuldarinnar hefði verið óvíst hvort Eurovision-söngvakeppnin færi fram í Ísrael á næsta ári.
Söngkonan Netta Barzilai bar sigur úr býtum í keppninni í ár fyrir hönd Ísraels með laginu Toy. Vegna þess verður keppnin haldin í Ísrael á vordögum 2019.
Ísraelskir fjölmiðlar höfðu greint frá því að ríkissjónvarpsstöð Ísraels, Kan, skuldaði EBU 12 milljónir evra og það yrði að greiða skuldina í dag.
Kan hafði óskað eftir því að ríkisstjórnin aðstoðaði við greiðsluna. Svörin frá fjármálaráðherra Ísraels voru á þá leið að stöðin ætti að nota eigin sjóði til að greiða EBU.
„Eurovision-vandinn er að baki!“ kom fram í tilkynningu frá Kan í hádeginu í dag.
„Stöðin mun greiða 12 milljónir evra til að halda keppnina,“ var sagt í fréttum Kan.
„Stöðin sér mikla möguleika í því að sjá um að halda keppnina í Ísrael. Við trúum því að ríkisstjórn landsins muni gera allt sem hún getur til að keppnin verði sem glæsilegust.“