J Hus í haldi lögreglu í London

Rapparinn J Hus, sem átti samkvæmt dagskrá að koma fram á tónlistarhátíðinni Secret Solstice í Laugardalnum í kvöld, var handtekinn í austurhluta London fyrir helgi og ákærður fyrir að hafa hníf í fórum sínum. 

J Hus er 23 ára og heitir réttu nafni Momodou Jallow. Í frétt Guardian segir að hann hafi verið handtekinn grunaður um að hafa hníf eða annað eggvopn í fórum sínum. Var bíll sem hann var í stöðvaður við Westfield-verslunarmiðstöðina á fimmtudag, segir í fréttinni.

J Hus var tilnefndur til þriggja Brit-verðlauna í ár. Í frétt Guardian segir að hann sé enn í haldi lögreglu og verði ekki sleppt fyrr en að mál hans verði tekið fyrir þann 20. júlí. 

Vísir greindi fyrst frá.

J Hus var kynntur sem einn þeirra sem átti að koma fram á tónlistarhátíðinni Secret Solstice.

• Blogga um frétt