Æfingar eru hafnar á söngleiknum Rocky Horror sem frumsýndur verður í Borgarleikhúsinu 16. mars. Mikill spenningur er fyrir verkinu og mættu yfir hundrað manns á opinn samlestur á því í vikunni.
Á samlestrinum lásu leikararnir verkið í heild og sungu auk þess lögin við píanóundirleik Jóns Ólafssonar, sem er tónlistarstjóri í sýningunni. Tónlistarmaðurinn Páll Óskar Hjálmtýsson fer með hlutverk Franks N. Furters en hann lék persónuna einmitt líka þegar leikfélag Menntaskólans við Hamrahlíð setti verkið upp á tíunda áratugnum.
Marta Nordal leikstýrir fleiri stjörnum í verkinu en tónlistarmaðurinn Valdimar Guðmundsson fer með hlutverk Eddies og Brynhildur Guðjónsdóttir með hlutverk Magentu.
Fimmtudaginn 1. febrúar verður sérstakur forsöludagur þar sem fólki gefst tækifæri til að tryggja sér miða áður en almenn sala hefst.