Katrín hertogaynja heimsótti grunnskólabörn í vikunni og spilaði við þau tennis. Sjálf hefur hertogaynjan mikinn áhuga á tennis en hefur minni tíma til að iðka íþróttina nú en áður.
„Ég elska tennis. Mér finnst það vera frábær íþrótt ég var mjög mikið í íþróttum þegar ég var lítil en minna núna þar sem ég á fullt af börnum,“ sagði hertogaynjan börnunum samkvæmt People.
Katrín á þau Georg og Karlottu og á von á sínu þriðja barni með Vilhjálmi Bretaprins í apríl. Það verður því lítill tími fyrir tennisæfingar á næstunni. Það er greinilega ekki eintóm sæla að vera gift erfingja bresku krúnunnar og eiga bráðum þrjú börn.