Ástralski gítarleikarinn og einn af stofnendum hljómsveitarinnar AC/DC, Malcolm Young, er látinn.
Young, sem var 64 ára gamall, greindist með heilabilun fyrir þremur árum.
Í tilkynningu frá aðstandendum Young sem BBC greinir frá kemur fram að hann hafi látist í faðmi fjölskyldunnar.
Malcolm og bræður hans tveir, Angus og George, gegndu allir stóru hlutverki í AC/DC um árabil, Angus sem aðalgítarleikari hljómsveitarinnar og George sem upptökustjóri. George lést í síðasta mánuði.
Malcolm Young fæddist árið 1953 í Glasgow en flutti með fjölskyldu sinni til Ástralíu þegar hann var 10 ára. Hann tók þátt í að stofna AC/DC árið 1973. Young kom að stórum hluta lagasmíða hljómsveitarinnar sem komu henni á heimskort rokksins, þar á meðal slögurunum Back in Black, Highway to Hell og You Shook Me All Night Long.
Áætlað er að plötur AC/DC hafi selst í yfir 200 milljónum eintaka um heim allan.
„Malcolm, vel að verki staðið,“ segir í yfirlýsingu sem send var út í tilefni af andláti hans.