Tónlistarmaðurinn Daði Freyr sem sló í gegn í undankeppni Eurovision í síðastliðinn vetur fer með aðalhlutverkið í nýjum íslenskum tölvuleik, Neon Planets, sem kemur út í App Store og Google Play á morgun, föstudag.
Í leiknum er að finna þrjú ný lög eftir Daða Frey. Spilarinn slæst í för með Daða Frey um litríkar neon-plánetur með það að markmiði að næla sér í nótur sem vantar til að fullkomna lögin. Á leið sinni þarf spilarinn að forðast slæmar nótur og keppast við að næla sér í stig og verðlaun.
Tölvuleikurinn er framleiddur af íslenska tölvuleikjaframleiðandanum Rosamosi ehf. sem hefur getið sér gott orð fyrir framleiðslu á tónlistartölvuleikjum fyrir börn undir nafninu Mussila. Neon Planets ft. Daði Freyr er fyrsti leikurinn í nýrri vörulínu sem höfðar til eldri spilara.