Litla sjarmatröllið Georg prins fagnar fjögurra ára afmæli í dag. Í tilefni dagsins sendi konungsfjölskyldan frá sér ljósmynd af drengnum. Á henni má sjá brosleitan verðandi konung Bretlands. 

Myndin er tekin af ljósmyndaranum Chris Jackson í Kensington-höll en þar býr Georg ásamt foreldrum sínum Vilhjálmi prins og Katrínu hertogaynju og systur sinni Karlottu. 

„Hertoginn og hertogaynjan deila þessari indælu mynd með gleði en í dag er haldið upp á fjögurra ára afmæli Georgs,“ segir í tilkynningu frá Kensington-höll. 

Litla fjölskyldan lauk í gær nokkurra daga opinberri heimsókn í Þýskalandi. Þar fékk Georg m.a. að fara um borð í þyrlu sem honum fannst mjög spennandi.

Heimsóknin hófst þann 19. júlí en þá lenti fjölskyldan í Berlín. 

Georg prins er þriðji í erfðaröðinni að bresku krúnunni á eftir föður sínum og afa. Langamma hans, Elísabet drottning, er fædd 21. apríl árið 1926 og er því 91 árs. Hún er enn við góða heilsu. Hún varð drottning þann 6. febrúar árið 1952 en var ekki krýnd formlega fyrr 2. júní árið 1953.

Karl Bretaprins, afi Georgs, er fæddur í nóvember árið 1948 og er því 68 ára. 

Hér að neðan má sjá myndasyrpu af afmælisbarninu.