Hljómsveitin Bárujárn frumsýnir spánýtt tónlistarmyndband við lag sitt Vopnafjörður. Lagið er jafnfram fyrsti „singúllinn“ af þriðju hljómskífu sveitarinnar sem er væntanleg á hausti komanda.
Myndbandið er unnið í samstarfi við vídeólistamanninn Sigurð Unnar Birgisson og dansarann Asiu Gruberska. Það fjallar um unga konu sem fer niður í fjöru og dansar við hafið. Þar sameinast tvö af helstu einkennismerkjum tónlistar Bárujárns: dans og hafið. Enda er tónlistinni best lýst sem dansvænu brimbrettarokki (e. surf).
Á dögunum kom svo Vopnafjörður út á 7 tommu vínylplötu á vegum Bónusplatna. Áhugasamir geta nælt sér í eintak á Kaffi Vínyl á Hverfisgötu.