Líf og fjör í Skoda salnum

Það var líf og fjör í Skoda salnum á laugardaginn þegar árlegur Skoda dagur Heklu var haldinn hátíðlegur. Fjöldi gesta lagði leið sína á Laugaveginn til að gæða sér á funheitum  grilluðum pylsum og skoða frumsýningarstjörnur dagsins, Skoda Kodiaq og Skoda Octavia.

Sportjeppinn Kodiaq er fyrsti jeppi Skoda í fullri stærð og hefur hlotið  fjölda verðlauna fyrir hönnun og nýsköpun í tæknilausnum, að því er fram kemur í tilkynningu frá Heklu.

Ný útfærsla á vinsæla fjölskyldubílnum Skoda Octavia var einnig frumsýnd en hún hefur fengið andlitslyftingu auk þess sem hún er stútfull af tækninýjungum og snjallari en nokkru sinni fyrr, segir þar einnig.

„Mikill spenningur hefur verið fyrir Kodiaq frá því að við tilkynntum um komu hans og um 100 manns hafa nú þegar forpantað jeppann,“ segir Gestur Benediktsson, sölustjóri Skoda. „Bílar í þessum stærðarflokki eru vinsælir þessa dagana og við fundum fyrir gríðarlegum áhuga gesta. Skoda Octavia er svo alltaf jafnvinsæll enda hefur hann verið einn söluhæsti fjölskyldubíll landsins síðustu ár og það var ljóst á Skoda deginum að gestum þótti nýja útfærslan koma vel út,“ bætir hann við.

Auk Kodiaq og Octavia mátti einnig skoða flaggskip Skoda, Superb, sem og lipra borgarsmábílinn Skoda Fabia og jepplinginn Skoda Yeti. Grillið var á fullu í góða veðrinu og yngsta kynslóðin fékk skemmtilega andlitsmálningu á meðan þeir fullorðnu kynntu sér bílaflotann. „Það var stríður straumur gesta allan daginn og veðrið var alveg frábært. Þetta var skemmtilegur og vel heppnaður dagur í alla staði,“ segir Gestur.

• Blogga um frétt