Samkeppni geti ekki byggt á að taka eignir annarra

„Samkeppni þarf að vera sanngjörn og getur ekki byggst á því að menn taki eignir annarra og nýti í starfsemi sinni og brjóti lög í þeim tilgangi að skapa sér stöðu á markaði,“ segir í yfirlýsingu Reiknistofu fiskmarkaða (RSF).

Tilefnið er að NRS ehf. sem hyggðist keppa við RSF mun ekki áfrýja staðfestingu Héraðsdóm Reykjaness á lögbanni sem sett var á félagið þann 22. október á síðasta ári.

Hafði dómskvaddur matsmaður komist að því að hugbúnaðurinn sem fyrirtækið studdist við hafi verið að miklu leiti líkt kerfinu sem RSF hefur hannað og notað til að þjónusta uppboð fiskmarkaða.

Í kjölfar staðfestingu lögbannsins var send út yfirlýsing frá NRS þar sem sagði: „Við erum enn sannfærð um sakleysi okkar.“

Frétt af mbl.is

„Enn sannfærð um sakleysi okkar“

Frestur til að áfrýja málinu til Landsréttar hefur hins vegar runnið út.

„Því er ljóst að dóminum verður ekki breytt heldur stendur hann óhaggaður og þar með lögbannið sem bannar NRS að halda uppboð í kerfi RSF sem stolið var og kópíerað og ætlað til notkunar í samkeppni við RSF,“ segir í yfirlýsingu RSF.

Vísað er til þess að dómskvaddur matsmaður sagði mikil líkindi milli kerfanna og að framendi og bakendi uppboðsklukkunnar hafi verið 98% eins. Aðeins nöfn félaganna tveggja var það sem ekki var eins í forrituninni.

Frétt af mbl.is

Lögbann á NRS staðfest vegna keimlíkra kerfa

• Blogga um frétt