Nýr togari Ramma smíðaður í Tyrklandi
Setja bókamerki
Stefnt er að því að nýr ísfisktogari hefji veiðar fyrir Ramma hf. á Siglufirði haustið 2023. Unnið er að lokafrágangi samnings um nýsmíðina milli Ramma og skipasmíðastöðvarinnar Celiktrans í Tyrklandi. Áætlað smíðaverð er nálægt þremur milljörðum króna, að sögn Ólafs Marteinssonar, framkvæmdastjóra Ramma.
Skipið er hannað af Nautic ehf. og verður mesta lengd 48,1 metri og breiddin 14 metrar. Það verður búið fjórum togvindum og aðalvélin 1.795 hestöfl. Skipið verður heldur styttra og aðeins breiðara en Akurey og Viðey, en búnaður áþekkur í skipunum. Þau skip voru smíðuð hjá Celiktrans fyrir Brim hf. og komu til landsins 2017.
Aldur skipa og breyttar aðstæður
Ólafur segir að aldur og samsetning skipa Ramma og hrun í humarveiðum hafi kallað á breytingar í flota fyrirtækisins og því hafi verið ákveðið að ráðast í nýsmíðina. Jafnframt er markmiðið með endurnýjuninni að minnka kolefnisspor útgerðarinnar. Hvernig veiðum verði síðan háttað og á hvaða skipum sé ekki tímabært að ræða á þessari stundu. Líklegast sé að áherslan á nýja skipinu verði lögð á bolfiskveiðar og einnig veiðar á humri taki humarstofninn við sér. Það sé ekki hugsað sem rækjuskip.
Frystitogarinn Sólberg er flaggskipið í flota Ramma, en það kom nýtt til landsins í maí 2017. Skipið hefur mest komið með hátt í 14 þúsund tonn að landi á einu ári og vel hefur gengið á þessu ári að sögn Ólafs.
Ísfisktogarinn Múlaberg (áður Ólafur Bekkur) hefur síðustu ár verið á rækjuveiðum frá því í mars og út september, en á bolfiskveiðum yfir vetrartímann. Skipið var smíðað í Japan 1973 og verður því hálfrar aldar gamalt þegar nýja skipið kemur.
Múlabergið er eitt af Japanstogurunum tíu sem komu til landsins 1973 og reyndust í flesta staði vel. Ólafur segir að skipin hafi verið vel byggð á sínum tíma og mikið sé eftir af Múlaberginu. Nú eru aðeins Múlaberg og Ljósafell frá Fáskrúðsfirði eftir af Japanstogurunum í íslenska flotanum.
Óarðbærar humarveiðar
Rammi gerir einnig út Fróða II ÁR 38 og Jón á Hofi ÁR 42, sem verið hafa á humri og fiskitrolli. Hrun varð í humarstofninum við landið fyrir nokkrum árum og í ár var heimilað að veiða 143 tonn, sem er aðeins 6-7% af því sem veitt var fyrir áratug. Beðið sé nýliðunar í stofninum og þegar stofninn taki við sér taki 5-7 ár áður en möguleiki verði að veiða eitthvað að gagni. Ólíklegt sé að það verði næsta áratuginn.
Rammi, Skinney-Þinganes og Vinnslustöðin eru með mesta hlutdeild í humarveiðum og segir Ólafur að eins og sakir standa séu humarveiðar óarðbærar. Fylgjast þurfi þó áfram með veiðislóðinni og þróun stofnsins, en jafnframt að veiða hluta af heimildum sem leyfðar verða í samráði við Hafrannsóknastofnun.
Gerir ráð fyrir 150 samningum í næstu viku
Almannavarnir auka viðbúnað
29 nautgripir fundust dauðir
Hæstiréttur staðfestir vanhæfi alls Landsréttar
Segjast ekki vera á kaldri slóð
Mikilvægt að vera á tánum