Samherji kaupir 50% í Aquanor í Bandaríkjunum

Samherji hefur gengið frá samningi um kaup á helmingshlut í Aquanor Marketing, Inc. í Boston, sem flytur inn, markaðssetur og selur ferskar sjávarafurðir í Bandaríkjunum. Þetta kemur fram í tilkynningu á vef Samherja en þar segir að Aquanor hafi verið „einn helsti viðskiptavinur Samherja í meira en áratug.“

Þá hefur töluverður hluti af innflutningi Aquanor komið frá Samherja og hafa afurðirnar verið seldar smásölukeðjum, veitingahúsakeðjum og heildsölum í Bandaríkjunum. Fyrirtækið hefur lagt áherslu á tegundir úr  Norður-Atlantshafi, meðal annars bleikja, þorskur, ýsa, lax og ostrur.

Fram kemur á vef Samherja að fyrirtækin hafi átt í viðræðum um nokkurra mánaða skeið áður en kom til samninga í þessum mánuði. Þá segir að Eric Kaiser, forstjóri Aquanor, mun áfram gegna því starfi en starfsmaður Samherja, Orri Gústafsson, verður í kjölfar fjárfestingarinnar framkvæmdastjóri viðskiptaþróunar Aquanor.

Tækifæri fyrir bleikjuna

Kaupin eru sögð skila samþættingu á sviði sölu og markaðsetningar og mun fjárfesting Samherja bera með sér að Aquanor leggi í auknum mæli áherslu á þorsk- og bleikjuafurðir.

„Framleiðsla á bleikju hefur aukist verulega á Íslandi á undanförnum árum og Samherji fiskeldi er nú stærsti einstaki bleikjuframleiðandi í heimi. Gert er ráð fyrir að framleiðsla á bleikju muni koma til með að aukast enn frekar á næstunni. Aquanor, sem er leiðandi í markaðssetningu á bleikju vestanhafs, mun nú koma til með að bjóða upp á ýmsar frosnar bleikjuafurðir til að mæta eftirspurn viðskiptavina sinna,“ segir í tilkynningunni.

Frétt af mbl.is

Samherji borar þrjár sjóholur í Grindavík

• Blogga um frétt