Hyggjast upplýsa um viðskipti við tengda aðila

Fjöldi sjávarútvegsfyrirtækja stefna að því að birta upplýsingar um viðskipti við tengda aðila og hvar skattar eru greiddir, samhliða upplýsingum um umhverfismál, félagslega þætti og stjórnarhætti. Er þetta liður í stefnu um samfélagsábyrgð sem fyrirtækin hafa sagst ætla að innleiða.

Fyrirtæki innan Samtaka fyrirtækja í sjávarútvegi (SFS) hafa sameinast um samfélagsábyrgðarstefnu. Í fréttatilkynningu frá samtökunum segir að stefnan byggir á heimsmarkmiðum Sameinuðu þjóðanna um sjálfbæra þróun.

Hægt er að nálgast stefnuna hér.

Megináherslur stefnunnar snúa að umhverfismálum og nýsköpun og er bent á  að „ábyrg og góð umgengni um náttúruna er skilyrði fyrir því að fiskistofnar við Ísland verði áfram nýttir með sjálfbærum hætti. Umhverfismál skipa af þeim sökum stóran þátt í stefnunni. Mikið hefur áunnist í þeim efnum á umliðnum árum, en markmiðið er að gera enn betur.“

Birta upplýsingar um skatta og tengda aðila

Þá segir í tilkynningunni að fyrirtækin, sem hafa aðild að stefnunni, vilji leggja sitt af mörkum til að efla traust á atvinnugreininni og auka gagnsæi enda sé þeim aðilum sem nýta sjávarauðlindina er falin mikil ábyrgð. Hafa fyrtækin skuldbundið sig til þess að birta ófjárhagslegar upplýsingar um umhverfismál, félagslega þætti og stjórnarhætti, þar sem stuðst er við alþjóðlega viðurkennd viðmið.

Auk þess er stefnt að því að birta upplýsingar um skattspor, hvar skattar eru greiddir og viðskipti við tengda aðila.

Fjöldi fyrirtækja hafa undirritað samfélagsstefnuna. Skjáskot

„Við hófum gerð samfélagsstefnu í fyrra og afraksturinn er kynntur núna. Við efndum til opinna funda og líflegra umræðna á meðal hagaðila sjávarútvegs, við héldum vinnustofu með stjórnendum fyrirtækja, við fórum umhverfis landið til að fjalla um og kynna samfélagsábyrgð fyrir félagsmönnum og fengum athugasemdir frá þeim og ábendingar. Þótt stefnan til framtíðar liggi fyrir, þá er vegferðin í raun að hefjast. Nú kemur það í hlut fyrirtækjanna að aðlaga starfsemina að stefnunni. […] Ég á því ekki von á öðru en að þessi öflugu sjávarútvegsfyrirtæki okkar víðsvegar um landið muni taka verkefnið föstum tökum,“ segir  Heiðrún Lind Marteinsdóttir, framkvæmdastjóri SFS, í tilkynningunni.

• Blogga um frétt