Taka á móti norskum skipum

Fjöldi norskra skipa hefur verið við höfnina á Fáskrúðsfirði undanfarna daga. Friðrik Mar Guðmundsson, forstjóri Loðnuvinnslunnar, segir að síðustu ellefu daga hafi Loðnuvinnslan tekið á móti sjö norskum skipum í hrognatöku.

„Við vorum með norska skipið, Steinsund, hjá okkur í löndun á föstudaginn. Við fengum síðan eitt skip í gær, Slaaterrøy, og svo er enn eitt, Knester, væntanlegt í dag,“ segir Friðrik og bætir við að ástæðan fyrir þessum mikla fjölda sé sú að loðnukvóti Norðmanna sé við það að klárast.

Loðnuvinnslan hefur af þeim sökum tekið á móti um 10.000 tonnum af loðnu undanfarna daga, segir í Morgunblaðinu í dag.