„Say Iceland“ vann Hnakkaþonið í ár

Brim hf. mun byggja upp eigið vörumerki undir nafninu „Say Iceland“ og selja fullunninn ufsa á nýja markaði á austurströnd Bandaríkjanna, nái tillögur sigurliðs Hnakkaþons HR og SFS, útflutningskeppni sjávarútvegsins 2018, fram að ganga.

Sigurliðið skipa þau: Tinna Brá Sigurðardóttir, meistaranemi í mannauðsstjórnun og vinnusálfræði, Sóley Sævarsdóttir Meyer laganemi, Serge Nengali Kumakamba og Yvonne Homoncik, skiptinemar í lagadeild, og Julia Robin de Niet, skiptinemi í tækni- og verkfræðideild. Hópurinn mun heimsækja Seafood Expo North America, stærstu sjávarútvegssýningu N-Ameríku, í Boston í mars, í boði Icelandair Group og sendiráðs Bandaríkjanna á Íslandi.

Áskor­un Hnakkaþons­ins í ár fólst í að finna leiðir til að auka sölu á sjó­fryst­um ufsa til hót­ela og veit­inga­húsa­keðja í Banda­ríkj­un­um, en hún var þróuð með Brimi hf., Eim­skipum og Sam­hent­um.

Í vinningstillögunni er lagt til að lögð verði aukin áhersla á íslensk gæði, sjálfbærni og jafnt framboð allt árið um kring í markaðssetningu á ufsa á Bandaríkjamarkaði. Þróað verði nýtt vörumerki, „Say Iceland“, og byggð upp aðstaða til fullvinnslu í Portland í Maine í Bandaríkjunum, þar sem ufsinn verði marineraður, reyktur eða hjúpaður brauðraspi.

Sérstök áhersla verði lögð á markaðssetningu á minni einingum fyrir háskóla, hjúkrunarheimili og vinnustaði. Sem dæmi um stærð þess markaðar benda nemendurnir á að yfir ein milljón nemenda sækir háskóla í New York-borg einni. Í framtíðinni er lagt til að aukin áhersla verði lögð á markaðssetningu beint til neytenda.

• Blogga um frétt