Fiskeldi í Þorlákshöfn þarf að fara í umhverfismat

Skipulagsstofnun hefur ákveðið að allt að 5.000 tonna fiskeldi Tálkna ehf. við Þorlákshöfn skuli háð mati á umhverfisáhrifum. Hægt er að kæra ákvörðunina til úrskurðarnefndar.

Fram kemur í ákvörðun Skipulagsstofnunar að Tálkni fyrirhugi að reisa fiskeldisstöð á lóð suðvestan þéttbýlisins í Þorlákshöfn á milli starfandi seiða- og fiskeldisstöðva. Svæðið sé að stærstum hluta í gamalli fjögurra til sjö metra djúpri námu, sem sé lítt frágengin en að nokkru sjálfgróin. Stöðin sé hönnuð til að ala laxfisk (bleikju, lax og sjóbirting).

Skipulagsstofnun segist telja að jafnmikið eldi og fyrirhugað sé kalli á nánara mat og greiningu þegar horft sé til staðsetningar og álagsþols náttúrunnar, einkum strandsvæða, m.a. vegna óvissu um magn næringarefna og úrgangs sem muni koma frá starfseminni.