Drangey komin til heimahafnar á Sauðárkróki

Mikill mannfjöldi fagnaði hinu nýja og glæsilega skipi Drangey SK 2, í eigu FISK Seafood, er það sigldi til heimahafnar í gær. Jón Edvald Friðriksson, framkvæmdastjóri félagsins, flutti ávarp og bauð skipið velkomið og sérstaklega skipstjórann Snorra Snorrason og áhöfn hans, en nokkrir áratugir eru síðan Skagfirðingar tóku síðast á móti nýju skipi.

Þá lýsti Jón skipinu og þakkaði öllum sem komu að þessu verkefni en sérstaklega þakkað hann Kristjáni Vilhelmsyni hjá Samherja mjög gott samstarf, en Drangeyjan er systurskip þriggja skipa Samherja. Drangey leysir af hólmi rúmlega fjörutíu ára gamalt skip félagsins, Klakk, sem mun verða selt. Það verður áhöfn Klakksins sem tekur við hinu nýja skipi undir skipstjórn Snorra Snorrasonar.

Þorgerður Katrín Gunnarsdóttir sjávarútvegsráðherra tók einnig til máls og ræddi um stórhug sem einkenndi sjávarútveg landsmanna sem kæmi meðal annars fram í því, sem væri sérlega ánægjulegt, að nánast öll hönnun og búnaður skipsins væri innlendur og væri það vottur um verulega skapandi tækni- og þekkingargreinar.

Ásta Pálmadóttir, sveitarstjóri Skagafjarðar, flutti FISK Seafood haminguóskir sveitarfélagsins og árnaði skipi og áhöfn allra heilla og færði skipstjóra og framkvæmdastjóra félagsins blóm. Þá tók einnig til máls Stefán Vagn Stefánsson, forseti sveitarstjórnar, og gaf skipinu nafnið Drangey, en að lokum flutti séra Sigríður Gunnarsdóttir bæn og blessaði skipið, og færði skipinu að gjöf biblíu frá Sauðárkrókskirkju.

Að lokinni dagskrá var gestum boðið að þiggja veitingar í boði félagsins og ganga síðan um borð og skoða fleyið.