Sveitarstjórnir Fjarðabyggðar og Djúpavogshrepps hafa þungar áhyggjur af stöðu framtíðaruppbyggingar fiskeldis á Austfjörðum, út frá þeim forsendum sem áhættumat Hafrannsóknastofnunar byggir á.
Þetta kom fram á fundi bæjarráðs Fjarðabyggðar sem haldinn var í gær. Segir í fundargerð ráðsins að frekari umræða verði á vettvangi sveitarfélagsins um fiskeldismál á næstu misserum. Þá er stefnt að íbúafundi með haustinu til að upplýsa um stöðu mála.
Áhyggjur sveitarstjórnanna eru reistar á áhættumati sem Hafrannsóknastofnun gaf út fyrr í mánuðinum, en skýrsla stofnunarinnar var lögð fram á fundinum í gær.
Laxastofn Breiðdalsár í mestri hættu
Er meðal annars lagt til í skýrslunni að laxeldi verði ekki aukið í Berufirði. Þá er lagst gegn eldi í Stöðvarfirði vegna nálægðar við Breiðdalsá, en náttúrulegur laxastofn árinnar á í mestri hættu á að verða fyrir áhrifum af laxeldi, samkvæmt dreifingarlíkani stofnunarinnar.
Í ályktun sveitarfélaganna tveggja segir að atvinnuuppbygging á suðurfjörðum Vestfjarða sé til marks um að flest bendi til þess að fiskeldi feli í sér eitt helsta sóknarfæri jaðarbyggða í atvinnuþróun og samfélagslegri uppbyggingu.
Falast eftir fundi með ráðherra
„Í ljósi þess falast sveitarstjórnir Fjarðabyggðar og Djúpavogshrepps eindregið eftir fundi með ráðherra sjávarútvegs- og landbúnaðarmála og forsvarsmönnum Hafrannsóknastofnunar við fyrsta tækifæri, svo fara megi yfir þau efnislegu rök sem standa til jafn umsvifamikillar skerðingar á fiskeldi á Austfjörðum og lagt er til í niðurstöðum áhættumatsins,“ segir í ályktuninni.
Jafnframt sé lögð áhersla á að stjórnvöld skjóti allri ákvarðanatöku á frest sem byggi með einhverju móti á áhættumatinu, þar til ljóst sé að forsendur matsins séu réttar.