Nýr krani á smábátabryggjuna

Nýr krani var tekinn í notkun á dögunum í Norðurfjarðarhöfn sem sveitarfélagið Árneshreppur rekur. Unnið hefur verið að því að tengja kranann og prófa en hann lyftir um 1.650 kílóum í lengstu stöðu sem er átta metrar en mun meiru þegar hann nær styttra út.

„Kraninn er fjarstýrður og því hægt að stjórna honum hvar sem er á bryggjunni. Kranamaður getur því horft niður í bátinn sem verið er að landa úr og er það talinn mikill kostur,“ segir Guðlaugur A. Ágústsson, hreppsnefndarmaður og vélstjóri, sem sér meðal annars um viðhald og alla umhirðu kranans. Höfnin hafi fengið mjög góða þjónustu frá fyrirtækinu Barka í Kópavogi þar sem kraninn var keyptur.

„Gamli kraninn var orðinn alveg búinn og eldgamall og ekki veitti af að skipta um krana nú þegar strandveiðitímabilið er að byrja eftir mánaðamótin og allt verður vitlaust í löndun.“

• Blogga um frétt